jueves, septiembre 11, 2014

El ñeru



EL ÑERU
                       
Mientres pudo y con pasu lentu,
llevábala del brazu
hasta los bancos y les palombes de los parques.
Cuando a ella yá nun-y daba l'aliendu
pa nenguna otra distancia,
caminaben namás, si'l sol yera clemente,
pela cera de la cai en que vivíen.

Dexe de velos y selmanes más tarde
vini a saber qu'ella morriera;
y tamién que con esa mesma mano
con que la sostenía,
el so fíu escribió unes llínees
sobre un vieyu ñeru
que toles primaveres
refaen les andarines
na vieya casa del pueblu
onde la so má criárase.

Que leyó aquella alcordanza al pie del nichu
y que quienes lu acompañaron ellí nel duelu
quixeron entender nes sos palabres
que falaba de lo murnia que ye la muerte
cuando la vida sigue anovándose
hasta nos bistechos mesmos de les ruines.

JCD

miércoles, septiembre 10, 2014